Ma quist „Forum“ laina dedichar ad ün scriptur frances chi’d es nat avant 100 ons, e quai es Albert Camus. Nat propi quists dis da november dal 1913 in Algeria, ingio cha seis bap d’eira emigrà sco Frances. Sia mamma d’eira üna indigena da l’Algeria, üna donna fich povra da relaziuns üm(i)las, üna donna eir mez analfabeta, co cha i’s doda, quai chi fa star stut, perche cha Albert Camus dvantarà ün dals gronds scripturs dal 20avel tschientiner.
Albert Camus chi es per mia generaziun stat ün scriptur chi’s ha stuvü lejer in scola. Eu craj cha minch’ün chi haja fat ün pa inavant cul frances varà let üna o tschell’ouvra. I dà las ouvras filosoficas, dad üna vart, per exaimpel quist Mitus dal Sisyphus, cha in frances ha’l clamà Le mythe de Sisyphe. E da quel cudesch - be per mossar ün pa che cha Camus ans ha regalà - da quel cudesch es restada üna frasa, cha blers han dodi e forsa darcheu invlidà, ma no tilla lain trar adimmaint, quista frasa bellezzas: “Il faut s’imaginer Sisyphe heureux.” I’s vess da s’imaginar cha Sisyphus d’eira forsa cuntaint. E quia vezzaina seis pensar tottafat nouv e oter. Sisyphus chi’d es quist pover schani chi ha da stumplar sü quista gronda peidra, e apaina ch’el füss süsom, o, cha (-) el vess vendschü quist chasti, schi rodla quist crap inavo darcheu jo la chavorgia, e el ha da cumanzar danouv.
